Smartphone ដ៏កម្រសាកថ្មពេញម្ដងប្រើបានពី១០ ទៅ១៥ថ្ងៃទើបអស់
15-December-2015 | ដោយ មួយឡា
ស្មាតហ្វូន ចេញថ្មីនៅលើទីផ្សារបច្ចុប្បន្នភាគច្រើនតែបង្អួតគ្នាលើមុខងារ និងបច្ចេកវិទ្យាថ្មីៗ ព្រមទាំងការរចនារូបរាង ចំណែកស្មាតហ្វូន ដែលយើងលើកយកមកចុះផ្សាយពេលនេះវិញ គឺមានចំណុចពិសេសនៅត្រង់ថាមពលថ្ម។ ក្រុមហ៊ុនទូរស័ព្ទចិន Oukitel ថ្មីៗនេះបានប្រកាសចេញសមិទ្ធផលដែលជាស្មាតហ្វូនកាន់ថ្មបានយូរ សាកម្ដងអាចប្រើបានរយៈពេលពី ១០ ទៅ ១៥ថ្ងៃឯណោះ។ ក្រុមហ៊ុនអះអាងថា ទូរស័ព្ទនេះប្រើពេលតែ ៣ម៉ោងកន្លះ នឹងអាចសាកថ្មពេញហើយ។
ស្មាតហ្វូន ម៉ូដែល K10000 នេះគឺមានកម្រិតថាមពលថ្មដូចឈ្មោះគឺ 10000mAh (១ម៉ឺនមិល្លីអំពែម៉ោង) ទើបធ្វើឱ្យវាកាន់ថ្មបានយូរថ្ងៃ។ លក្ខណៈ សម្បត្តិទូទៅនៅលើ K10000 គឺបានភ្ជាប់ដោយអេក្រង់ ៥,៥អ៊ីញជាមួយកម្រិត 720p ប្រើឈីបអង្គប្រតិបត្តិប្រភេទ quad-core MediaTek ល្បឿន 1GHz ផ្គួបជាមួយ RAM 2GB និងមានអង្គចងចាំ 16GB (អាចបន្ថែម microSD បាន)។
ស្មាតហ្វូនថ្មខ្លាំងនេះ មានកាមេរ៉ា 8MP និងខាងមុខ 2MP បំពេញមុខងារ selfie បានល្អ ហើយវាដំណើរការដោយ Android 5.1 Lollipop។ ក្រៅពីមានថ្មខ្លាំង K10000 ក៏មានទម្ងន់ស្រាល ដែលស្រាលជាងទូរស័ព្ទ iPhone 6S ទៅទៀត គឺត្រឹមតែ ១៨៤ក្រាម។
វាជាស៊េរីទូរស័ព្ទធនមធ្យម ដែលមានតម្លៃត្រឹមតែ ២៤០ដុល្លារអាមេរិកប៉ុណ្ណោះ នឹងមានលក់លើទីផ្សារដើមឆ្នាំ២០១៦ ខាងមុខ៕
ប្រភព ៖ techspot , bizkhmer
ចំនួនអ្នកទស្សនា
- ថ្ងៃនេះ4691
- ម្សិលមិញ12561
- សប្តាហ៍នេះ32641
- ខែនេះ54521
- ឆ្នាំនេះ54521
- សរុប20496977